Հակասություններ՝ Փաշինյանի թիմում. ինչո՞ւ ՔՊ-ն չի սատարում Սասուն Միքայելյանի որդուն

Մենք արդեն տեղեկացրել էինք, որ հոկտեմբերի 21-ին նշանակված Հրազդանի քաղաքապետի արտահերթ ընտրություններում ինքնաառաջադրվել է Սասուն Միքայելյանի որդին՝ Սևակ Միքայելյանը, ով նաև «Քաղաքացիական պայմանագիր» կուսակցության տարածքային կազմակերպության ղեկավարն է։

Այսօր ՔՊ մամուլի խոսնակ Վահան Կոստանյանը ֆեյսբուքյան իր էջում գրել է, որ «Քաղաքացիական պայմանագիրը» նպատակահարմար չի գտնում պաշտպանել վերջինիս թեկնածությունը և ընտրություններին թեկնածու չի առաջադրելու։

Հասարակության համար ՔՊ այս որոշումն ավելի քան անակնկալ է, եթե հաշվի առնենք այն հանգամանքը, որ Նիկոլ Փաշինյանի կուսակցության վարչության նախագահը հենց Սասուն Միքայելյանն է, ով, բնականաբար, պետք է շահագրգիռ լիներ, որպեսզի իր որդին քաղաքական աջակցություն ունենա առաջիկա ընտրություններում։ Եթե Նիկոլ Փաշինյանի թիմն, այնուամենայնիվ, ձեռնպահ է մնացել նման որոշումից, ապա կարող ենք մի քանի հետևություններ անել։

Շատ հնարավոր է, որ Նիկոլ Փաշինյանը հավատարիմ է մնում հեղափոխության իդեալներին ու անթույլատրելի է համարում մերձավորներին հովանավորելու ավանդույթը, թեև սա ակնհայտորեն այդ դեպքը չէ, որովհետև Սևակ Միքայելյանին ոչ թե նշանակում են գործադիր պաշտոնում կամ արտոնություն են տալիս նրա բիզնեսին, այլ ընդամենը պետք է աջակցություն ցուցաբերեին իրենց տարածքային կառույցի ղեկավարին, ով հավակնում է ստանալ իր համաքաղաքացիների վստահության քվեն։ Եթե նույնիսկ չլիներ Սասուն Միքայելյանի գործոնը, ապա թերևս տարօրինակ է, որ կուսակցությունը հրաժարվում է քաղաքական աջակցություն ցուցաբերել իր տարածքային կառույցի ղեկավարին, որն իր թիմով շատ ակտիվ է եղել թավշյա հեղափոխության օրերին։

Ակնհայտ է, որ այս պարագայում խոսք չի կարող լինել հովանավորչության մերժման մասին, նույնքան ակնհայտ է, որ խնդիրը ոչ թե Սևակ Միքայելյանի, այլ նրա հոր՝ Սասուն Միքայելյանի ու Նիկոլ Փաշինյանի հարաբերությունների մեջ է։

ՔՊ-ում ամեն ինչ չէ, որ հարթ է, ու հակասություններ կային նաև Երևանի ավագանու արտահերթ ընտրություններից առաջ, որոնց մասին արտահոսք եղավ նունիսկ ԶԼՄ-ներում։ Առավել ևս՝ նորություն չեն հակասությունները Նիկոլ Փաշինյանի ու Սասուն Միքայելյանի միջև, որոնք պարբերաբար եղել են, անգամ հրապարակային որոշակի դրսևորում են ստացել՝ նույնիսկ մինչև հեղափոխությունը։ Հիմա թերևս հակասությունների նոր փուլն է, որը կարող է ավելի գլոբալ պատճառներ ունենալ, մանավանդ որ Միքայելյանը երկրապահական միջավայրից է ու ինտեգրված չէ Փաշինյանի փոքր «պոլիտբյուրոյին», բացի այդ՝ ՔՊ վարչության նախագահը, ըստ որոշ լուրերի, ավելի շատ հակված է եղել դաշինքային հարաբերությունների պահպանմանը «Ելքի» շրջանակներում։

Սակայն հակասությունները գուցե պայմանավորված են հենց Հրազդանի ընտրություններով։ Չի բացառվում, որ Փաշինյանը Հրազդանում նախընտրելի այլ թեկնածու է ունեցել, սակայն Սասուն Միքայելյանը չի զիջել, ինչի հետևանքով էլ առաջացել է այս վիճակը։

Загрузка...

Ամեն դեպքում ՔՊ-ն Հրազդանում չի աջակցում Սևակ Միքայելյանին՝ ձեռնպահ մնալով իր թեկնածուին առաջադրելուց։ Հրազդանին ծանոթ մարդիկ գիտեն, որ ՔՊ-ի թեկնածուն Հրազդանում չէր կարող ընտրվել առանց Սասուն Միքայելյանի թիմի աջակցության, մյուս կողմից՝ ՔՊ-ն հրապարակավ փաստորեն իրեն սահմանազատել է Սասուն Միքայելյանից՝ ակնհայտ դարձնելով, որ Նիկոլ Փաշինյանի թիմում հասունանում են հակասություններ։

Սակայն այս իրավիճակում, երբ Սևակ Միքայելյանն առաջադրվել է, իսկ ՔՊ-ն՝ նրան չաջակցելով հանդերձ, թեկնածու չի ունենալու, գրեթե կանխատեսելի է դարձնում Սասուն Միքայելյանի որդու հեշտ հաղթանակը Հրազդանի քաղաքապետի ընտրություններում։

Միացեք Armenia Today Ֆեյսբուքյան խմբին։

Աղբյուրը՝https://www.1in.am/2435338.html

Be the first to comment on "Հակասություններ՝ Փաշինյանի թիմում. ինչո՞ւ ՔՊ-ն չի սատարում Սասուն Միքայելյանի որդուն"

Leave a comment

Your email address will not be published.


*


ԴԻՏԵԼ